లక్ష్మీ నృసింహ కరావలంబ స్తోత్రము
శ్రీమత్పయోనిధినికేతన చక్రపాణే
భోగీన్ద్ర భోగమణి రాజిత పుణ్యమూర్తే,
యోగీశ శాశ్వత శరణ్య భవాబ్ధిపోత
లక్ష్మీనృసింహ మమ దేహి కరావలమ్బమ్‌.1
బ్రహ్మేన్ద్ర రుద్ర మరుదర్క కిరీటకోటి
సంఘట్టితాఙ్ఘ్రి కమలామల కాన్తికాన్త
లక్ష్మీలసత్కుచ సరోరుహ రాజహంస
లక్ష్మీనృసింహ మమ దేహి కరావలమ్బమ్‌.2
సంసారసాగర విశాలకరాళకామ
నక్రగ్రహగ్రసన నిగ్రహవిగ్రహస్య
మగ్నస్య రాగలసదూర్మినిపీడితస్య
లక్ష్మీనృసింహ మమ దేహి కరావలమ్బమ్‌.3
సంసారఘోరగహనే చరతో మురారే
మారోగ్రభీకరమృగ ప్రవరార్దితస్య
ఆర్తస్య మత్సర నిదాఘనిపీడితస్య
లక్ష్మీనృసింహ మమ దేహి కరావలమ్బమ్‌.4
సంసారకూపమతిఘోర మగాధమూలం
సంప్రాప్య దుఃఖశతసర్ప సమాకులస్య
దీనస్య దేవ కృపయా శరణాగతస్య
లక్ష్మీనృసింహ మమ దేహి కరావలమ్బమ్‌.5
సంసారభీకర కరీన్ద్రకరాభిఘాత
నిష్పీడ్యమాన వపుషస్సకలార్దితస్య
ప్రాణప్రయాణభవభీతి సమాకులస్య
లక్ష్మీనృసింహ మమ దేహి కరావలమ్బమ్‌.6
సంసార సర్పవిషదష్ట భయోగ్రతీవ్ర
దంష్ట్రాకరాళవిషదగ్ధ వినష్టమూర్తేః
నాగారివాహన సుధాబ్ధినివాస శౌరే
లక్ష్మీనృసింహ మమ దేహి కరావలమ్బమ్‌.7
సంసారజాలపతితస్య జగన్నివాస
సర్వేన్ద్రియార్థబడిశస్థ ఝషాత్మనశ్చ
ప్రోత్తమ్భిత ప్రచుర తాలుక మస్తకస్య
లక్ష్మీనృసింహ మమ దేహి కరావలమ్బమ్‌.8
సంసారవృక్ష మఘబీజ మనన్తకర్మ
శాఖాయుతం కరుణపత్త్రమనఙ్గపుష్పమ్‌
ఆరుహ్య దుఃఖజలధౌ పతితో దయాళో
లక్ష్మీనృసింహ మమ దేహి కరావలమ్బమ్‌.9
సంసారదావదహనాకులభీకరోగ్ర
జ్వాలావళీభిరభిదగ్ధతనూరుహస్య
త్వత్పాదయుగ్మసరసీరుహమస్తకస్య
లక్ష్మీనృసింహ మమ దేహి కరావలమ్బమ్‌.10
సంసారసాగరనిమజ్జనముహ్యమానం
దీనం విలోకయ విభో కరుణానిధే మామ్‌
ప్రహ్లాదఖేదపరిహార పరావతార
లక్ష్మీనృసింహ మమ దేహి కరావలమ్బమ్‌.11
సంసారయూధగజసంహతిసింహదంష్ట్రా
భీతస్య దుష్టమతిదైత్యభయంకరేణ
ప్రాణప్రయాణభవభీతినివారణేన
లక్ష్మీనృసింహ మమ దేహి కరావలమ్బమ్‌.12
సంసారయోగిసకలేప్సితనిత్యకర్మ
సంప్రాప్యదుఃఖసకలేన్ద్రియమృత్యునాశ
సఙ్కల్ప సిన్ధుతనయాకుచకుఙ్కుమాఞ్క
లక్ష్మీనృసింహ మమ దేహి కరావలమ్బమ్‌.13
బద్ధ్వా కశైర్యమభటా బహు భర్త్సయన్తి
కర్షన్తి యత్ర పధి పాశశతైర్యదా మామ్‌
ఏకాకినం పరవశం చకితం దయాళో
లక్ష్మీనృసింహ మమ దేహి కరావలమ్బమ్‌.14
అన్ధస్య మే హృతవివేక మహాధనస్య
చోరైర్మహాబలిభి రిన్ద్రియనామధేయైః
మోహాన్ధకారకుహరే వినిపాతితస్య
లక్ష్మీనృసింహ మమ దేహి కరావలమ్బమ్‌.15
లక్ష్మీపతే కమలనాభ సురేశ విష్ణో
యజ్ఞేశ యజ్ఞ మధుసూదన విశ్వరూప
బ్రహ్మణ్య కేశవ జనార్దన వాసుదేవ
లక్ష్మీనృసింహ మమ దేహి కరావలమ్బమ్‌.16
ప్రహ్లాద నారద పరాశర పుణ్డరీక
వ్యాసామ్బరీషశుకశౌనక హృన్నివాస
భక్తానురక్త పరిపాలన పారిజాత
లక్ష్మీనృసింహ మమ దేహి కరావలమ్బమ్‌.17
ఏకేన చక్రమపరేణ కరేణ శఙ్ఖ
మన్యేన సిన్ధుతనయా మవలమ్బ్య తిష్ఠన్‌
వామేతరేణ వరదాభయహస్తముద్రాం
లక్ష్మీనృసింహ మమ దేహి కరావలమ్బమ్‌.18
ఆద్యన్తశూన్యమజమవ్యయమప్రమేయ
మాదిత్య రుద్ర నిగమాది నుత ప్రభావమ్‌
త్వాఽమ్భోధిజాస్యమధులోలుపమత్తభృఙ్గం
లక్ష్మీనృసింహ మమ దేహి కరావలమ్బమ్‌.19
వారాహ రామ నరసింహ రమాదికాన్తా
క్రీడావిలోల విధిశూలిసురప్రవన్ద్య
హంసాత్మకం పరమహంసవిహారలీలం
లక్ష్మీనృసింహ మమ దేహి కరావలమ్బమ్‌.20
మాతా నృసింహ శ్చ పితా నృసింహః
భ్రాతా నృసింహ శ్చ సఖా నృసింహః
విద్యా నృసింహో ద్రవిణం నృసింహః
స్వామీ నృసింహ స్సకలం నృసింహః.21
ప్రహ్లాదమానససరోజవిహారభృఙ్గ
గఙ్గాతరఙ్గధవళాఙ్గ రమాస్థితాఙ్గ
శృఙ్గారసఙ్గ కిరీటలసద్వరాఙ్గ
లక్ష్మీనృసింహ మమ దేహి కరావలమ్బమ్‌.22
శ్రీశఙ్కరార్యరచితం సతతం మనుష్యః
స్తోత్రం పఠేదిహ తు సర్వగుణప్రసన్నమ్‌
సద్యో విముక్తకలుషో మునివర్యగణ్యో
లక్ష్మీపతేః పద ముపైతి స నిర్మలాత్మా.23
యన్మాయయార్జితవపుః ప్రచురప్రవాహ
మగ్నార్తమర్త్యనివహేషు కరావలమ్బమ్‌
లక్ష్మీనృసింహచరణాబ్జమధువ్రతేన
స్తోత్రం కృతం శుభకరం భువి శఙ్కరేణ.24
శ్రీమన్నృసింహ విభవే గరుడధ్వజాయ
తాపత్రయోపశమనాయ భవౌషధాయ
తృష్ణాదివృశ్చికజలాగ్ని భుజఙ్గరోగ
క్లేశవ్యయాయ హరయే గురవే నమస్తే.25
